茶記二代創獨家口味奶茶 有賴爸爸支持
「金二少」老闆Isaac本身在加拿大唸書，其後回港擔任健身教練，「其實我無諗過佢會返嚟。」這位身穿潮牌，說話溫文的爸爸Raymond說，他沒有想過兒子會回港，更莫論兒子有日竟跟隨自己的腳步，成為「茶餐廳二代」，二人可以拍住上工作。
Isaac從小就跟着爸爸工作，「以前住九龍灣，嗰時成日跟爸爸坐個令兩個鐘車去屯門良景做嘢，嗰時嗰間叫做大班粥，之後佢再開金大班。」他回憶起童年笑說，回港後，他時不時到茶餐廳幫手，本身只是抱住「幫屋企手」的想法，「始終爸爸年紀都大，有日都可能要幫手。」雖這樣說，但Isaac當時並未有確實接手的時間表，真正改變他人生旅程的契機，是2020年影響全世界的新冠疫情。
「疫情時Gym Room閂晒，唔想日日喺屋企無嘢做，就多咗落去茶餐廳幫手，乜都學下，點樣沖奶茶，點炒沙嗲牛。」Isaac說，其後他遇到金茶王，師傅鼓勵他學習自己沖茶、揀茶葉等，他再慢慢嘗試提升金大班的配方，推出自己的奶茶口味，亦開始產生興趣，「疫情時見到啲阿公阿叔，即使無咗堂食，佢哋都堅持夜晚要嚟買杯加大奶茶坐喺出面飲，咁當時嘅環境未必適合佢哋出出入入，咁不如入落樽俾佢哋，之後就越賣越多。」樽仔奶茶就這樣在金大班中誕生出來。
當Isaac想將樽仔奶茶擴大時，Raymond就插嘴說，「嗰時我唔睇好。」儘管不太看好，但Raymond依然沒有阻止Isaac投入這份新事業，其後更幫Isaac為樽仔奶茶設廠，「後生仔真係後生仔，睇嘢好快。」這位父親忍不住稱讚，「佢仲有樣嘢好，啲奶茶堅持唔落防腐劑同人造色素，呢樣嘢佢好堅持，其實真係好難做。」現在樽仔奶茶已經成功打入Citysuper等大型超市。